Naimbitaran ako sa sarong burunyagan sa Quezon, habo ko
man magsayuma ta maraot daa. Alas kuwatro nin maaga nagbyahe kami ni agom
pasiring Quezon. Pababa pa sana ako sa sinakayana mi na jeep nadadangog ko na
an sermon ni Father Damaso, huna ko ngani may rally sa laog kan simbahan.
Pano-pano ki mga pobreng katoliko an simbahan ta saro ining munisipalidad na
kadaklan kan tawo paraoma. Pobre kun baga. Nagsimba sinda para magtao nin
pasasalamat sa biyaya na nakuwa ninda sa aldaw kan kapaskuhan.
Sa may enotan kan simbahan so arong kan mayor na nananao
nin kwarta sa mga kaakian na saiyang nasasakupan. Maray si mayor tan aka isip
magtao pero dae ko aram kun sa kaban ito kan bayan o sa sadiri nyang bulsa pero
maurag ta bukas an saiyang harong para sa gabos.
Kan nagpoon na so bunyag, sabi ni father “ Total pasko
man maglaag kamo ki kwarta sa ipapanao
na sobre, dae ipagbalik kun wara ining laog. ” Uyugon mo an, an bubunyagan nasa
20 na kaakian na an kada saro sang ribo an bayad. 20 mil tulos an makukuwa,
wara pa so koleksyon sa misa asin sa sobre. Kaherak man kan mga tawong ini na
mga simple an kabuhayan asin kadaklan paraoma. Bako naman donasyon, garo hold
up na an nangyari. Imbes na dapat ngani libre na sana an pagbunyag ta pasko man
nagi lugod na business. Pwera pa kan bado na sulog kan mga umboy, igwa pang
pinanaong bado na kaiba daa sa bayad. Aanohon man ninda ito pagtapos kan
bunyag?
Kan nagbubunyag si father, iridalian sa laog ki 30 minutos
tapos na so misa na dae lamang nagtao ki sermon para sa mga ninong asin ninang
na dapat maging ehemplo sinda bilang panduwang magurang.
Kadaklan sa mga nagsimba iyo sana ki iyo, narumduman ko
lamang na kaito kan panahon ni Padre Damaso ginibong instrumento an simbahan
ngani mapasunod an mga tawo, hanggang ngunyan padagos pa ining nangyayari.
An simbahang Katolika an pinakamayaman sa gabos, nyata
kaipuhan pa maghagad sa mga pobreng ini?
Buhay pa si Padre Damaso hanggang ngunyan.
