Busy At The Moment

message sent
warang reply
pm sent
warang reply
tweeted
no response
baad mananggad busy
di bale
padaba ta ka
dae ko kaipuhan ki simbag
ta aram ko na

Sa Saimong Daghan

saen baya?

mamamatian

an kugos na daeng kaimbutan
an pagmating ako sana
an saimong padaba
saen pa kundi sa saimong daghan

Habo Ko

habo ko

na magturog na dae taka kataid

o an sakuyang mata solong ipikit

muya ko na ika kuguson

sa rarom kan banging malipoton

habo ko
na magmata na wara ka sa pagmuklat
muya ko madangog ako saimong padangat
an maheling an mahamis mong ngirit
sa kada paghadok kan aldaw sa langit

habo ko
na magtukaw na mamundo’
muya ko kapot ang saimong kamot kun nagpapahingalo
ika nakasandig sa sakuyang daghan
an maogmang nakaagi satuyang balikan

habo ko
na maheling an luha sa saimong mata
itatao saimo ang sakuyang pagpadaba
an muya ko an maging maogma kita
hanggang sabay kitang magduyan sa liya liya

An Tugon

sarong aldaw naghilingan an dating mag ilusyon, nagkumustahan so duwa asin nag balyuhan ki numero ki cellphone. si babae igwa na ki pamilya asin may duwa na ki aki, naoogma man so dati niyang kailusyon ta maski papano nasabi na nya saiya an bagay na ito. wara na man ki ama so mga aki kaya solong pig buhay kan babae an saiyang mga aki.sarong bangi na text si lalaki na an muya nya kada, pagmata, pag-abot hale sa eskwela asin bago magturog hahadukan nya an mga aki para sa saiya. iyo na sana daa an paagi nya kan pagpadaba nya sa mga aki kan babae. nagtugot man so babae. oro aldaw nag tetext so lalaki kan saiyang pakihuron sa babae.

makalipas ki sarong semana, dae na syang naresibeng text sa dati nyang ilusyon, pero padagos pa an saiyang paghadok sa mga aki nya na naging dalan para magibo nya ini uro aldaw na dae nalilingawan. paglipas ki sarong bulan may uminabot na surat sa saiya.

" kun nababasa mo ining surat na ini malamang nagtalikod na ako sa mundo, kan nagtuparan kita semana na sana an pig bibilang ko, pinirit ko na hanapon ta ka pero naaraman ko na may pamilya ka na palan. so tugon ko saimo na hadukan sinda iyo an paagi ko na dae mo pagbalewalaon an kada oras na kaiba mo sinda asin hadukan, na pwedeng sa paghale mo mawara sinda saimo. padabaon ta ka kaya dae ka maghibi, an pagkamoot ko para sa saimo ipamati mo sa mga aki mo "

Dae Mo Man Taramon

namamatian ko
an init kan pagkamoot
an hamis
an pagsuriyaw
an pag iidaw
maski daeng boses
namamatian ko
maske dae mo man taramon

Sa Saimong Mata

sa saimong mata
nasasalming an ogma
arog kan pagsirang kan aldaw
pirme ako saimong naiidaw
sa hamis kan ngirit mo
nawawara an paha kan puso ko
sa kada bangguing kaiba ta ka

An Lagapak Kan Uran Sa Sakuyang Atop

saro, duwa, tulo

nagpoon na ang ritmo

naglipot na ang paros

kaipuhan ki kakugos

mantang nagkakanta an mga talapang

namumundo akong tawo sa kina’ban

Ngunyan, Sagkud Pa Man

ngunyan, sagkud pa man
ika ang sakuyang papadabaon
iibanan sa lakaw kan buhay mo
sa kaogmahan asin sa kamundu’an
sa aldaw na malilipot ako an saimong tamong
an makugos saimo para maging mahimbong
an mahungit sa aldaw na dae ka makakakaon
an masukray kan saimong buhok
asin an maalalay kun dae ka makatindog
ako an magiging sandigan mo
an ilaw sa panahon na madiklom
an sirungan sa aldaw na mauran
ako an magiging kaapil mo
an mahampang sa bagyo kan buhay
an magiging angkla sa dagit na dagat
ako asin ika
ngunyan, sagkud pa man

Arog Kan Sarong Burak

makolor 
mahamot
asin magayon
arog kang sarong burak

pagkamoot
simbolo
alay
arog kang sarong burak

tuninong
nagbabayle sa paros
maogma
arog kang sarong burak

ika
padaba ko
sagkod pa man
arog kang sarong burak

Sa Pagmuklat Kan Mata

sa pagmuklat kan mataika an muyang makaiba
na kukuguson asin sasabihan ka
halea na an muta sa saimong mata
hahadukan ang saimong pisngi
maski ang liwoy mo giniraan ini
kakahurunon ka ki may pagkamoot
maski angaw mo bako pa mahamot