Monday, August 6, 2012

Dae Pagbasahon : Sige Lugod, Basaha Na



              
                Atab pa kan nagsakay ako sa FX pasiring sa Quiapo, aw inda kun ano an naglaog sa alimantak ko ta na-isipan ko na mag lamyerda. Pagkalipas ki perang minuto nakasakay man giraray ako, nagtatagdo an sakuyang daplos pagkatukaw ko. Dae ko aram kun natutunaw ako sa sobrang init o naruru’mit na ako sa kataning ko na nalingawan gayud mag dyeta. Busy an kada muro sa kakapindot kan saindang mga cellphone, dae na namangnuhan na may naligis na sarong aki. Sige man giraray an pindot, so saro sige an kuwa ki ladawan, baad ilalaag sa Facebook nya. Naheling ko an sarong tarpaulin ki sarong pulitiko na sabing “ A PROJECT OF YOUR HONORABLE MAYOR “, a project of your honorable mayor? Huna ko kwarta mi an hale sa samuyang buwis nata ta pangaran mo an nakalaag?

                Tinurugan ko so byahe ta trapik sa may bandang Araneta Avenue, naglalaag daa sinda ki underpass para sa matuwid na daan. Dae ko aram kun talagang sementado na an dalan pasiring sa pag asenso o pigtatapalan sana ki espalto nganing dae maheling an lubak. Pero dakul man giraray an nadadalinas. Nagimata akong lagpas na sa dapat ko na bababaan, Liwasang Bonifacio na palan ako, ay hamag sana an. Buminaba ako asin naglakaw na sana pasiring sa Quiapo, atab pa man asin magayon an panahon. Mainit asin maparos paros. Naagihan ko so sarong salog na kolor tsokolate na, dakul an naglalataw lataw. May plastic, may basura, water lily, gadan na ayam, gadan na ikos, gadan na kino. Nangalagkalag ako baad may maheling ako na gadan na tawo, wara man. May nakasurat na “Buhayin Natin Ang Ilog Pasig ” sa sarong parte kan riprap. Haluyon na panahon na pigbubuhay an salog na ini, garo na baga ini nasa ICU. Pigoperahan na, pig harale na so mga informal settler, ain pigpunduhan na kan gobyerno asin mga pribadong organisasyon. Iyo man giraray. Kun baga sa tawo, comatose na an salog na ini. Saen daw napaduman so kwarta na pinundo digdi? Binulsa? Nasayang lang sa wara? Comatose man giraray an salog na ini. Sayang kan effort, sayang kan kwarta, sayang kan oras.

                Sa wakas. QUIAPO. Ano an sikat sa Quiapo pwera kan simbahan? Ang nagkalat na MAGIC POTION, pamparegla, delay an regla, gayuma, pampa virgin. Huh? Pampavirgin, iyo dakulaon nakasurat. Pwede gayud ining gamiton kan mga lusyang na, garo man sana teenager na dae pa nagisi so hymen. Pero an pamparegla na an front man sana an kan herbal na pampalaglag. Iyo. Tama an dangog mo, pang abort. Mga pampahid sa rayuma, buni, alipunga. Bulong sa naungman. Sa sarong lugar kun saen harani sa simbahan yaun man an alipores ni Taning. Anting anting, buntot pagi, pangontra sa aswang, likido ki kobra, pampahid na lana ( inda kun igwa so piglalahid kan manananggal ) asin kun ano ano pang pampahale ki maraot na ispritu asin malas. Sa heling ko bako ini epektibong pam palayas ki karautan ta mismong sa gilid sinda kan simbahan nagkukuta. Naglakaw ako pasiring sa Lacson underpass, nakahigda an mga aking huba asin mga urusingon. Nagtuturo an sipon asin dae mo na maaraman kun ini kalansay na buhay o buhay na kalansay. Naghahagad ki piso para may pambakal daa ki tinapay. Ginawgawan ko man sabay dalagan sa sarong lalaki na sa tantya ko tugang nya. Nagbalyong tinampo asin diretso sa sarong harware, pagbalik may darang plastic na an laog sa ona ko Jelly Spread. Sininghot ni nonoy so rugby sa laagan, sayang kan piso ko. Ako pa so rason na nadagdagan so pambakal nya ki rugby.

                Nagbaba na ako sa pig aapod ko na HAGDAN TUNGO SA KAHIRAPAN, yaraun digdi natitipon an mga paralimos. Gurang. Aki. Babae.Lalaki. Bakla.Tomboy. Mga nakahigda sa hagdan. May turog, may nagkakanta. May buta. Mga pinabayaan na kan saindang pamilya, kan saindang gobyerno. Sa katahawan kan underpass kadakol an mga pigpapabakal na kun ano ano. Inda ta wara na so tindahan digdi kan vibrator, dildo, sex toys, bolitas asin pirok kan kambing. Igwa pano kaitong sarong killjoy na nagreport ki Tulfo kaya sinda na raid. Nagluwas ako sa may parte kan Quezon Ave, sa may hampang kan Greenwich. Nagpasiring sa likod kun saen talamak an pagpapabakal ki piniratang DVD, CD, VCD. “ Boss DVD DVD “ apod sakuya kan sarong nagtitinda, “ May bago kami, bold ba? Meron kami Katrina at Hayden ”. Kahampang an sarong kaunan kun saen nagkakaon an mga bundat na pulis ki mami buda tinapay. Nagbalik ako sa Plaza Miranda kun saen nagkalat an mga para tinda ki maski ano, pang gadan ki kino, panghale ki bara, lobo, kawatan, burak, tinapa, prutas, gulay, aki. Iyo, aki. Pero dae ko sigurado kun totoo na may pigpapabakal na aki. May mga aki na sigeng durudalagan na daeng kalson, pigbubukod ang mga naglalayog na langaw. Haen na daw so mga magurang kaini.

                Sa likod kan simbahan nagkalat man ang mga pigpapabakal na rosaryo, rebulto, palaspas, kandila, altar, bracelet buda kun ano ano pa na patungkol sa diyos. Narumduman ko na nadagit si Kristo kaito kan kadakol na nagtitinda sa sambahan kan saiyang Ama. Ano daw kun buhay ngunyan si Kristo? Ano daw an sasabihon nya sa mga namamahala kan simbahan?  Nagdiretso ako pasiring sa Paterno, sa mga laboratoryo asin bakalan ki mga salming sa mata. Dakul digdi. Ibong ibong an mga tindahan. Pila pila an mga laboratoryo. Kun gurano man kadakol an pagpapalinaw sa mata iyo man kun gurano kita buta sa mga naheheling ta sa palibot. Nagkalat an mga basura, mga taong grasa asin mga tambay na daeng trabaho. Alas dyes na palan, mamahaw daw muna ako. Diretso ako pasiring sa Carriedo, surusuan an tawo. Sale palan sa SM Quiapo, saro sa mga bako na sikat na SM. Nagkaon ako sa may gilid kaini. Basog na pero naheheling ko kun gurano kagutom an tawo sa palibot ko. Gutom sa pagkamoot ki sarong pamilya, gutom sa serbisyo kan gobyerno. Basug basug na man an nasa pwesto, na sa sobrang kabasugan, tinurugan na ninda an saindang nasasakupan. Paminsan minsan nakakatana man an saindang mga nasasakupan ki pakaon ki lugaw na dae bangot. Arog kan buhay minsan may siram, minsan wara.

                Ugto na pero imbes magkaraon, beer an nasa lamesa sa sarong KTV bar. Mga sintunadong boses na nagngangaw ngaw sa kanta ni Frank Sinatra. Mga suka na nagkalat sa salog. Baad pigtakasan ninda an saindang problema sa pag inum pero pag naubatan na mas malala na problema ta nakapasa ki gamit sa KTV bar.  Mapait daa an problema kan buhay, mapait man an beer pero masiram pag malipot.

                Napagal na ako kakatalibong, nag desisyon na akong umuli. Nag agi liwat ako sa simbahan. Inapod ako ki sarong manghuhula. Itago ta na sana siya sa ngaran na Madam Auring. Gurang na pero may alsom pa daa siya. Si Madam Auring an pinaka makapangyarihan na nilalang sa mundo gamit an pagbasa kan saimong palad. Aram nya an mangyayari saimo. Tuminukaw ako ta pagal naman akong kaka talibong. Kinaputan nya an sakuyang kamot asin hinapot an pangaran ko. Ini an manghuhula na dae mahulaan an pangaran ko. Sa kantidad na P50, kaya nya daang maaraman an sakuyang future. Game sabi ko. Tinaas an saiyang kamot na garo nag aagda ki mga spirits, sana bako ispiritu ki gadan na kongresman an makuwa kaini. Kaya nya man daang ikulam an mga kaiwal ko. Oragon si tiya. Di payt man ako.Magiging mayaman daa ako buda magkakaigwa ki dakol na aki. So enot baad iyo, mayaman ako pero so panduwa alanganin si tiya ta sabi kan gobyerno maipapasa na daa so RH Bill. Baad dae ko na padakulon an guwapo ko na lahi. Tama na gayod na diit sana kaming guwapo. Kun dinagdagan ko pa gayon so bayad ko baad naaraman ko kun saen nakalubong so Yamashita Treasure. Kaya lang ngunyan ko na sana naisipan.

                Nagigiulok akong naglakaw pasiring sa sakayan kan FX. Garo nalansi ako ni Madam Auring. Nasaruan ako. Dae ko aram kun nag palansi ako o talagang linansi ako. Naglalansihan. Nalansi. Nadaya. Dae mo naman ini malilikayan, siguro kaito nadaya man sinda, ngunyan naman an pagkakataon na mandaya sinda.

                Sa bandang katapusan, sadiri ta man sana an piglalansi ta. An pigdadaya sa arog kaining proseso. Pagmati ko dara ko an gabat kan mundo. Sa kadakol tang tawo na nasyon na ini, saro sana ang nasa isip ko ngunyan.

                “ dae ko na sana isipon, garo so may magiginibo man ako “

…. naglakaw na sana ako pasiring sa sakayan na garo warang nangyari.

pinoylakwatsero.com

No comments:

Post a Comment