Byaheng Bikol

Para sa mga dae pa naka eksperyensya magsakay sa THE LEGENDARY ST JUDE TRANSIT

      Lintiasan an, Holy Week kaipuhan ko mag uli sa Legazpi kaya dali dali na ako sa terminal sa Ali Mall, ta sabi sa bareta nag buroklusan na so mga mabyahe. Bitbit so sarong bag ki bado. Hamag an ta alas 12 na ki ugto bata muya ko magbyahe ki atab. Maka urag pano so palabas, nag ralamaw lugod ako. Sa wakas, Ali Mall na.....ay lintikurasan kadakol ki mabyahe, fully booked na maski so ordinary.

     Balyo ako sa may Crame, iyo man. Naghalat pa ako ki 3 oras, kang pag abot kang sarong bus sabay barabad kang bag sa bintana nganing ma enotan ko na so masakay (agta malansi). Pagpundo, surusuan kaya sa bintana na ako uminagi. Nem. May tukawan na, naghahalat halat ki maray na kataid. Nangangadyi ako na bakong gurang o may kaiba na aki. Jackpot iyo nangad so itinao sakuya. Sabi kang gurang, "Nonoy, pwede ako dyan sa may bintana ta sige ako ki suka sa byahe?" Mala. Saro pa nag taid sakuya may kargang aki. Kawasa. Sa likod iyo man pati sa hampang...ano ini field trip? 

     Naglarga na maayahayon ta maparos paros so byahe, yan ang ona ko. Aw ta puminundo sa may Pasay Terminal, pati so tahaw kang bus pigla'gan ki tukawan. Garo na kami sardinas, halo halo na so parong. May parong asmod, parong hale sa oma, parong pokpok ta nagwawaras ang hamot. Iling ilinga daw an na mabyahe ki ordinary bus todo ang porma, garo ma atender ki JS Prom. Kadakol ang bitbit, may biskwit sa lata, may donuts..ano ona nindo sa Legazpi wara kaan?  May igwang darang manok, ido buda mga orchids. Garo na Noah's Ark. Sabayan pa ki nag yoyosi urawang nag dadalagan ang bus. Kung kusuarin nasa kasiraman ka na kang turog saka man makurahaw so kataid mo na aki. Uya na so parong kang bunay, parong kang badi na balon pag minapundo ang bus. Garo na baga basurahan ta nagkaralat na.

     Masabay pa so mga taga Bikol na sigeng taragalog sa bus, masabi sana na nakapa Manila, may tono man ngani. Aram mo na kung taga saen ta may punto.  Ay iyow......(nem taga saen an). 

TIPS SA PAGSAKAY SA ST. JUDE

·         Ataban nindo kung muya nindo sa inutan magtukaw ta sa bandang likod garo na pugon sa kadakol nag sisigarilyo.

·         Dae nangad mag su'log ki bakong kumportableng bado, pwede na ang shorts asin t shirt. Ordinary tabi ang sinakayan bako aircon.

·         Magdara ki balon na pagkaon o tubig ta lintian ang mahal kang pagkaon sa stop over.

·         Dae asin dae magbitbit ki biskwit na nasa lata asin donut..aram na tulos pagbaba mo sa bus na hale ka sa Manila. Buda igwa man kaan sa Gaisano.

·         Magdara lang ki diit na bagahe nganing dae ka maperwisyo sa pagsakay.

·         Dapat full charge ang CP asin may darang extra na baterya.

·         Dae mag para tagalog ta gabos kita bikolano, mariraw kung dayo ka.

·         Kung habo mo maki su'suan sa ALI MALL o sa PASAY TERMINAL, mahiwas tabi sa may CRAME.

·         Dae mag nanok sa pagkaturog ta kadakol na ang nakalagpas, may mababa ki naga sa legazpi na nagbaba.

      Maka ogmahon magsakay sa ordinary ta bako mga isnabera asin isnabero ang kataid mo. Depende ko may asmod ta ako ISNABERO.

MAOGMANG PAGBYAHE SA GABOS, MAPA ORDINARY O AIRCON O EROPLANO MAN ANG SAKAYAN NINDO. 

  SABI BAGA NI SHARON " TARA SAKAY NA "