Sisay Ka?

               Sa hampangan kan gate, sya hinapot kang taga bantay kung mapasaen sya. “ Mapasaen ka tabi? Igwa ka tabi ki appointment ki Boss.” Sabay heling saiya poon bitis hanggang payo. “ Igwa tabi ako ki tuyo, pwede tabi ako maglaog? ” ang hapot kan lalaking ini sa taga bantay. “ Kung dae ka man tabi ki appointment o rekomindasyon dae man tabi pwede mag laog. ” Nagpirit makalaog so lalaki sa gate pero siya hinarang kan taga bantay. Nag kaigwa ki ribok sa may luwasan kan napa agi so Boss.

                Inapod kan lalaki so Boss. “ Boss, pwede ta ka daw tabi makahuron? ” nagrani asin kinahuron ni Boss so lalaki. “ Ano tabi ang tuyo mo sakuya ta gusto mo ako makahuron asin muya mo makalaog sa sakuyang poder?” inakbayan kan Boss so lalaki asin nagtukaw sinda sa luwas kan gate, kung saen dakol man ang muya makalaog. “ Muya ko po makalaog dyan sa poder mo.” kan sinabi nya ini naheling nya so saiyang kaamigong ba’gong laya sa presohan na nakalaog sa gate. “ Uy padi, nakapasar ka palan adi ta nakalaog ka dyan, alaton mo ako kahuron ko lang si Boss, makusog ang backer ko siguradong makakalaog ako.” Nagtango sana ang saiyang padihon asin nag ngirit sa saiya sabay diretso sa laog kang magayonon na building.

                Hinapot nya si Boss nata so amigo nya na ex convict nakalaog sa building nya samantalang sya na marhay ang track record dae pa nakaka laog. Saro saro nyang pinaheling ang saiyang credentials, nag graduate ki pinaka halangkaw sa klase, naging marhay na ehemplo, sarong taga sunod sa tukdo kan simbahan, naging marhay na magurang asin marhay sa kapwa. Pigahapot nya na nata si barkada nya para-ha’bon, para gadan asin maka sa’lanon nakalaog sa saiyang poder.

                Sinimbag sya ni Boss, “ Rumdom mo kaitong panahon na ehemplo ka sa gabos, maray sa kapwa asin sa pamilya?” “ Iyo po, dapat baga makalaog man ako ta magayon ang credentials ko.” Inakbayan sya asin naglakaw sinda pasiring sa hardin kan lugar na ito. “ Rumdom mo kan nagadan ang mga magurang mo asin pamilya mo? Ako baga so pig basol mo. Liningawan mo ako. Ako na nagpadaba saimo, makulog ang boot ko. Ako na dapat na sandalan mo pero ako saimong binasol asin tinalikudan. ” Nag hibi si Boss pero nagpadagos asin itinuro so saiyang padihon “ Siya, nata pighahapot mo kung nata nakalaog sa sakuyang natad na sarong makasa’lan? Pigbasolan nya ang saiyang ginibo asin inapod ako para maghagad ki tawad na udok sa boot. Padaba nya ako na sa ibong kang ginibo nyang karautan sakuya, sya duminalagan asin nag agad ki ayuda na patawaraon ko siya.” Dae nakasimbag ang lalaki. Nagtalikod si Boss na makulog ang boot. Pig rani sya kan bantay sa gate asin sinabihan sya “ Pasensya na tabi pero wara digdi sa libro kan buhay ang pangaran mo.”