Rasay

mahimbong pa ang tamong sa higdaan
kugos ko ika sa sakuyang daghan
sabay kitang nangangarap kang para sa aga
kang para sa satuya asin para sa mga aki ta
binuksan asin sinarado ko
ang maletang pano ki bado
mainit ang luhang nagbabagsak sa mata
itatao magayon na buhay sa sainda
maging maharayo man ako
ini gabos titiuson ko

sa sakuyang pagbalik kamo enot mahiling
haloy na taon ako nag tios
tinipid ko ang sadiri para may madara pauli
nganing maski diit na ngirit nindo pu'ngaw ko mahali
sa pagbaba sa eroplano muya ko na layugon
nganing gabos kamo sakuyang kuguson
haloy na akong namamawot saindo
halos dalaganon ko mailing lang kamo
gusto ko maheling ang saimong pandok
hale saimong mahamis na hadok

pero iba ang sakuyang naabotan
iba ang sakuyang naaraman
pagkamoot mo napasa, nagkalamat
dae ko aram kung pa'no mo ako sinabat
na igwang ibang padaba ang saimong puso
makulog, narurunot, nata nagibo sako'
may kusog ka pa na boot na ako may sala
na daeng natao so buhay na muya
dae man ako naghigda duman sa kwarta
tinipon gabos para ipadara sa pamilya

ugaring padabaon ko ikang marhay
mapapatawad ko ika dae ka lang mawara sa buhay
ta pinangako ko saimo ika, ika sana ang padaba
maski sa pagtrabaho ako magka kuruba
pero nata maski akong pirit ko
namamatian ko sa sakuyang puso
wara na ako dyan sa daghan mo
liningawan ang pangako sako'
pinili mo ang materyal na bagay
na sa ona mo iyan magpapa ogma saimong tunay

pirit ko man na isipon
pirit ko man na akoon
aram ko na bako na ako
ang laman kang puso mo
nagpoon ng magaba
nagpoon na ang luha
ang bilog ko na buhay
diit diit na nag rarasay.....